WSL အောင်ပွဲကို အောင်ပွဲခံလိုက်တဲ့ Manchester City ရဲ့ နောက်ကွယ်ရိုက်ကူးရေးရုပ်သံမှတ်တမ်း

Manchester City FC ဟာ ၂၀၂၅/၂၆ ရာသီ Barclays Women’s Super League ဖလားကို သမိုင်းဝင် ဆွတ်ခူးနိုင်ခဲ့တဲ့ အကြောင်းအရာတွေနဲ့ ဖွဲ့စည်းထားတဲ့ ‘Our Way’ အမည်ရတဲ့ နောက်ကွယ်ရိုက်ကူးရေးရုပ်သံမှတ်တမ်း တစ်ခုကို ထုတ်လွှင့်ပြသလိုက်ပါပြီ။ ဒီမှတ်တမ်းဗီဒီယိုဟာ Blues တို့ရဲ့ အအောင်မြင်ဆုံး ရာသီတစ်ခုဖြစ်ပြီး လိဂ်ဖလားနဲ့ FA Cup ဖလား နှစ်လုံးတည်းကို သူတို့ရဲ့ သမိုင်းတစ်လျှောက် ပထမဆုံးအကြိမ်အဖြစ် သိမ်းပိုက်နိုင်ခဲ့ပုံကို အလေးပေး ပြသထားပါတယ်။

ပြီးခဲ့တဲ့ရာသီက Manchester City အသင်းဟာ စိန်ခေါ်မှုတွေနဲ့ ရင်ဆိုင်ခဲ့ရပြီး မျှော်မှန်းထားချက်တွေနဲ့ လွဲချော်ခဲ့ရပါတယ်။ ဒါပေမဲ့ နည်းပြချုပ်သစ် Andrée Jeglertz ရဲ့ လမ်းညွှန်မှုအောက်မှာတော့ အမျိုးသမီးဘောလုံးလောကရဲ့ ထိပ်ဆုံးနေရာကို ပြန်လည်ရယူဖို့ စိတ်အားထက်သန်စွာနဲ့ အသင်းကို ပုံစံသစ် တည်ဆောက်ခဲ့ပါတယ်။ အသင်းလူစာရင်း ကို ပိုမိုတောင့်တင်းစေဖို့နဲ့ Women’s Super League (WSL) မှာ ခြေစွမ်းပြ ဖို့အတွက် ကစားသမားသစ်တွေလည်း အသင်းနဲ့ အရှိန်အဟုန်မြှင့် ပူးပေါင်းလာခဲ့ပါတယ်။

ရာသီမစတင်မီ ခန့်မှန်းချက်တွေအရ လက်ရှိဥရောပချန်ပီယံ Arsenal နဲ့ WSL ဖလားကို ခုနစ်ကြိမ်ဆက်တိုက် ရယူဖို့ ရည်မှန်းထားတဲ့ Chelsea တို့လို အင်အားကြီးကလပ်တွေကသာ ရေပန်းစားခဲ့တာပါ။ ဒါပေမဲ့ အားလုံးရဲ့ ထင်ကြေးတွေကို ချေဖျက်ပြီး အောင်ပွဲခံသွားခဲ့တာကတော့ Manchester City ပဲ ဖြစ်ပါတယ်။ သူတို့ဟာ နိုဝင်ဘာလလယ်ကတည်းက လိဂ်ဇယားရဲ့ ထိပ်ဆုံးနေရာဆီ အစပြု ဦးဆောင်နိုင်ခဲ့ပြီး WSL သမိုင်းတစ်လျှောက် သူတို့ရဲ့ အကောင်းဆုံး ရမှတ်စံချိန်ကို တူညီအောင် စွမ်းဆောင်နိုင်ခဲ့ပါတယ်။

Manchester City ရဲ့ အောင်ပွဲဆီသွားတဲ့ ခရီးလမ်းမှာ မြို့ခံပြိုင်ဘက် တွေဖြစ်တဲ့ Chelsea နဲ့ Arsenal တို့ကို အနိုင်ယူပြီး အစွမ်းပြနိုင်ခဲ့ပါတယ်။ Liverpool နဲ့ London City Lionesses တို့လို အသင်းတွေကိုလည်း ခက်ခက်ခဲခဲနဲ့ အနိုင်ရလဒ်တွေ ရယူပြသနိုင်ခဲ့တဲ့ အသင်းရဲ့ ကြံ့ကြံ့ခံနိုင်စွမ်းကိုလည်း တွေ့မြင်ရပါတယ်။ နည်းပြချုပ် Andrée Jeglertz ရဲ့ အသင်းဟာ ဘယ်လိုစိန်ခေါ်မှုတွေနဲ့ပဲ ရင်ဆိုင်ရပါစေ အနိုင်ရလဒ် ရရှိအောင် အမြဲတမ်း နည်းလမ်းရှာဖွေနိုင်ခဲ့ပုံကို ဒီရုပ်သံမှတ်တမ်းက အမိအရ ပုံဖော်ပြသထားပါတယ်လို့ သိရပါတယ်။

ဒီနောက်ကွယ်ရိုက်ကူးရေးရုပ်သံမှတ်တမ်းထဲမှာ နည်းပြချုပ် Andrée Jeglertz အပြင် စီမံခန့်ခွဲမှုဒါရိုက်တာ Charlotte Brough၊ အားကစား ဒါရိုက်တာ Therese Sjögran နဲ့ ဖလားရရှိအောင် အဓိက စွမ်းဆောင်ပေးခဲ့တဲ့ ကစားသမားတွေရဲ့ အင်တာဗျူးတွေကိုပါ ထည့်သွင်းရိုက်ကူးထားပြီး သမိုင်းဝင်အောင်မြင်မှုရဲ့ နောက်ကွယ်က အကြောင်းအရာတွေကို အသေးစိတ် တင်ဆက်ထားပါတယ်။ ဒါဟာ Manchester City ရဲ့ စိတ်ဓာတ်ပြင်းပြမှု၊ ဘောလုံးနည်းဗျူဟာ သဘောတရား နဲ့ အသင်းအဖွဲ့လိုက် စည်းလုံးမှုကို ဖော်ပြနေပြီး နောင်နှစ်ပေါင်းများစွာအထိ အမှတ်ရနေမယ့် ရာသီတစ်ခုအဖြစ် ဂုဏ်ပြုလိုက်တာလည်း ဖြစ်ပါတယ်။

ဒီမှတ်တမ်းဗီဒီယိုဟာ ပြီးခဲ့တဲ့ အောင်မြင်မှုတွေကို ပြန်လည်ပုံဖော်ပေးရုံတင်မကဘဲ လာမယ့်ရာသီသစ်မှာလည်း အရှိန်ရ ဆက်လက်အောင်မြင်ဖို့နဲ့ အမျိုးသမီးဘောလုံးလောကရဲ့ ထိပ်တန်းဆုဖလားတွေကို ဆက်လက်စိန်ခေါ်သွားဖို့အတွက် အသင်းကို တွန်းအားပေးလှုံ့ဆော်ရာလည်း ရောက်တယ်လို့ ဆိုပါတယ်။