Tottenham ကနေ Real Betis ရဲ့ ကယ်တင်ရှင် ဖြစ်လာခဲ့တဲ့ Troy Parrott

Troy Parrott ရဲ့ Real Betis ပြောင်းရွှေ့မှုဟာ ပရိသတ်တွေနဲ့ ဘောလုံးသုံးသပ်သူတွေကြားမှာ အကြီးအကျယ် လှုပ်ခတ်သွားစေခဲ့ပြီး စပိန်မီဒီယာတွေကတော့ သူ့ကို ကလပ်ရဲ့ "ကယ်တင်ရှင်" လို့တောင် တင်စားခေါ်ဝေါ်နေကြပါတယ်။ AZ Alkmaar အသင်းမှာ ၉၇ ပွဲ ကစားပြီး ၅၁ ဂိုးသွင်း၊ ၁၇ ဂိုး ဖန်တီးပေးနိုင်ခဲ့တဲ့ အသက် ၂၄ နှစ်အရွယ် တိုက်စစ်မှူးဟာ အခုအခါမှာတော့ La Liga ဆီကို ခြေလှမ်းသစ် လှမ်းလိုက်ပြီ ဖြစ်ပါတယ်။

Troy Parrott ရဲ့ ကစားသမားဘဝဟာ Tottenham Hotspur မှာ အစပြုခဲ့တာဖြစ်ပြီး အသင်းကြီးမှာ ပုံမှန်ကစားခွင့်ရဖို့ ရုန်းကန်ခဲ့ရပါတယ်။ လွန်ခဲ့သော ၂၀၂၄ နှစ် ခုနှစ်က ပေါင် ၆.၇ သန်းနဲ့ AZ Alkmaar ဆီ ကလပ်မှထွက်ခွာသွား ခဲ့တာက သူ့အတွက်တော့ အလှည့်အပြောင်းတစ်ခု ဖြစ်ခဲ့ပါတယ်။ အခုအခါမှာတော့ Real Betis က သူ့ကို ပေါင် ၁၇.၁ သန်းနဲ့ ခေါ်ယူလိုက်ပြီဖြစ်ပြီး Tottenham Hotspur အနေနဲ့လည်း ၂၀ ရာခိုင်နှုန်း ပြန်လည်ရောင်းချမှု အကျိုးအမြတ်ခံစားခွင့်ကြောင့် ပေါင် ၃.၄ သန်းဝန်းကျင် ရရှိမှာဖြစ်လို့ အသင်းလူစာရင်း အားဖြည့်ဖို့အတွက် အချိန်ကိုက် ငွေကြေးအင်အား ဖြစ်လာစေပါတယ်။

Real Betis အသိုင်းအဝိုင်း မှာတော့ ပျော်ရွှင်မှုတွေနဲ့ မျှော်လင့်ချက်တွေ ဖုံးလွှမ်း နေပါတယ်။ စပိန်သတင်းဌာန SPORT ကလည်း Troy Parrott ဟာ ကလပ်အသင်းဘက်က လွန်ခဲ့သောနှစ် နှစ် ၁၀ကျော်ကတည်းက စိတ်အားထက်သန်စွာ ရှာဖွေနေခဲ့ရတဲ့ ကစားသမားမျိုးဖြစ်တယ်လို့ ထောက်ပြပြောဆို ထားပါတယ်။ အသင်းမှာ နှစ်ပေါင်းများစွာ အားကိုးရမယ့် တိုက်စစ်မှူးကောင်း မရှိခဲ့တဲ့ ပြဿနာအတွက် သူ့ရဲ့ရောက်ရှိလာမှုက အကောင်းဆုံး အဖြေတစ်ခု ဖြစ်လာမှာပါ။

SPORT သတင်းဌာနက Troy Parrott ကို Hugo Sánchez၊ Robert Lewandowski တို့လို ဘောလုံးလောကရဲ့ ဂန္ထဝင်တွေနဲ့ပါ နှိုင်းယှဉ်ပြီး ချီးကျူးခဲ့သလို ခေတ်သစ်ဘောလုံးလောကမှာ တကယ့်အထောင်တိုက်စစ်မှူးစစ်စစ် ရှားပါးမှုကိုလည်း အလေးပေးဖော်ပြသွားခဲ့ပါတယ်။ ဒီ Ireland လက်ရွေးစင် ကစားသမားရဲ့ အရည်အသွေးတွေဟာ Real Betis လိုအပ်နေတဲ့အရာတွေနဲ့ ကွက်တိဖြစ်နေပြီး သူ့ရဲ့ခေါ်ယူမှုက တိုက်စစ်ကစားဟန်ကို လုံးဝပြောင်းလဲသွားစေလိမ့်မယ်လို့ မျှော်လင့်နေကြပါတယ်။

ဒါတင်မကသေးဘဲ Troy Parrott ကို Real Betis ရဲ့ အိုင်ကွန်တွေဖြစ်တဲ့ Ricardo Oliveira နဲ့ Jorge Molina တို့ရဲ့ အမွေကို ဆက်ခံမယ့်သူအဖြစ်ပါ ရှုမြင်နေကြပါတယ်။ Ricardo Oliveira ရဲ့ ပါဝင်ပတ်သတ်မှု တွေဟာ ကလပ်ကို Champions League ဝင်ခွင့်နဲ့ Copa del Rey ဖလား ရရှိအောင် ကူညီပေးခဲ့ဖူးသလို Jorge Molina ကလည်း ကလပ်သမိုင်းမှာ အစဉ်အမြဲ လေးစားခံရသူ ဖြစ်ပါတယ်။

Troy Parrott တစ်ယောက် Real Betis မှာ စာချုပ် သစ်နဲ့ အခန်းကဏ္ဍ အသစ်ကို စတင်ချိန်မှာတော့ ကလပ်ကို အမြင့်ပျံနိုင်အောင် ဂိုးတွေ သွင်းယူပေးနိုင်မလားဆိုတာ အားလုံးက စောင့်ကြည့်နေကြပါတယ်။ ဖိအားတွေနဲ့ မျှော်လင့်ချက်တွေ မြင့်မားနေတဲ့အချိန်မှာ Troy Parrott အနေနဲ့ သူ့အပေါ်ထားရှိတဲ့ မျှော်လင့်ချက်တွေကို အကောင်းဆုံး အကောင်အထည်ဖော်ပြီး Real Betis ရဲ့ အနာဂတ်အောင်မြင်မှုတွေအတွက် အဓိက အစိတ်အပိုင်း ဖြစ်လာမလားဆိုတာ စောင့်ကြည့်ရတော့မှာ ဖြစ်ပါတယ်။