Arsenal နဲ့ Tottenham တို့ရဲ့ အပြောင်းအရွှေ့ အားပြိုင်မှုကြား ရောက်ရှိနေတဲ့ Victor Osimhen

နွေရာသီ အပြောင်းအရွှေ့ စျေးကွက် ဟာ အတော်လေးကို အရှိန်ရ လာနေပြီး Galatasaray အသင်းက ဂိုးသွင်းစက်ကြီး Victor Osimhen ကို ခေါ်ယူဖို့အတွက် မြောက်လန်ဒန် မြို့ခံပြိုင်ဘက် နှစ်သင်းဖြစ်တဲ့ Arsenal နဲ့ Tottenham တို့အကြား အပြိုင်အဆိုင် ပြင်းထန်လို့ နေပါတယ်။

Victor Osimhen ဟာ Galatasaray အသင်းအတွက် ၇၅ ပွဲ ကစားပေးခဲ့ရာမှာ ၆၁ ဂိုးသွင်းပြီး ဂိုးဖန်တီးမှု ၁၆ ကြိမ်အထိ ပြုလုပ်ထားတဲ့အထိ အံ့အားသင့်စရာ ခြေစွမ်းပြ သတ်မှတ်ချက်တွေကို ပိုင်ဆိုင်ထားတာပါ။ ဒီလို အချက်အလက်တွေကြောင့်ပဲ Barcelona၊ Atletico Madrid၊ Al-Hilal နဲ့ Manchester United တို့လို ထိပ်တန်းကလပ်တွေက မျက်စိကျနေပေမဲ့ အခုအချိန်မှာတော့ မြောက်လန်ဒန် ကလပ်နှစ်သင်းကပဲ တိုက်ရိုက် ပြိုင်ဆိုင်မှုတွေ ပြုလုပ်နေတယ်လို့ သိရပါတယ်။

ဒီအပြောင်းအရွှေ့မှာ စိတ်ဝင်စားစရာ အကောင်းဆုံးအချက်ကတော့ Victor Osimhen အနေနဲ့ ၂၀၂၄ ခုနှစ်မှာ Galatasaray ကို စတင်ရောက်ရှိကတည်းက ဝတ်ဆင်ခဲ့တဲ့ ကျောနံပါတ် ၄၅ ကို ကလပ်နှစ်သင်းစလုံးက ပေးအပ်နိုင်စွမ်း ရှိနေတာပဲ ဖြစ်ပါတယ်။ ဒီနံပါတ်ဟာ သူ့အတွက်တော့ ရိုးရိုးနံပါတ်တစ်ခုထက်မကဘဲ အပြောင်းအရွှေ့တစ်ခုကို စဉ်းစားတဲ့အခါမှာ ရေရှည် တည်ငြိမ်မှုနဲ့ ရင်းနှီးကျွမ်းဝင်မှုကို ကိုယ်စားပြုနေတာပါ။

Victor Osimhen ရဲ့ မကြာသေးမီက ပြောကြားချက်တွေအရလည်း သူဟာ Galatasaray ကနေ ထွက်ခွာဖို့ အခွင့်အရေးကို လုံးဝ ငြင်းပယ်ထားခြင်း မရှိပါဘူး။ သူက "အပြောင်းအရွှေ့ စျေးကွက် ရောက်တိုင်း ကောလာဟလတွေကတော့ အမြဲတမ်း ရှိနေတာပါပဲ။ ကျွန်တော်ကတော့ ကိုယ့်အလုပ်အပေါ်မှာပဲ အာရုံစိုက်ထားပါတယ်။ နောက်ပိုင်း ဘာတွေဖြစ်လာမလဲဆိုတာကိုတော့ စောင့်ကြည့်ပြီးမှ စဉ်းစားသွားမှာပါ" လို့ ပြောကြားခဲ့ပြီး အပြောင်းအရွှေ့အတွက် တံခါးကို ဖွင့်ချထားခဲ့ပါတယ်။

တကယ်တော့ သူ့ရဲ့ ကစားသမားဘဝတစ်လျှောက်မှာ ကျောနံပါတ် ၉ ဟာ အရင်းနှီးဆုံး ဖြစ်ခဲ့ပေမဲ့ လက်ရှိမှာတော့ Tottenham မှာ Richarlison ကလည်းကောင်း၊ Arsenal မှာ Gabriel Jesus ကလည်းကောင်း အသီးသီး ဝတ်ဆင်ထားကြပါတယ်။ ဒါကြောင့်ပဲ ၂၀၁၈ ခုနှစ် Royal Charleroi SC မှာ ကစားစဉ်ကတည်းက စတင်ဝတ်ဆင်ခဲ့တဲ့ ကျောနံပါတ် ၄၅ ဟာ Victor Osimhen အတွက် အဓိက ဆွဲဆောင်မှုတစ်ခု ဖြစ်လာခဲ့တာပါ။

နည်းပြချုပ် Mikel Arteta ရော Roberto De Zerbi ပါ ဒီအခွင့်အရေးထူးကို အသုံးချဖို့ စိတ်အားထက်သန်နေကြပါတယ်။ Arsenal မှာဆိုရင် ကျောနံပါတ် ၄၅ ကို Jack Henry-Francis နောက်ဆုံး ဝတ်ဆင်ခဲ့ပြီး Tottenham မှာတော့ ၂၀၂၂/၂၃ ရာသီက Alfie Devine ဝတ်ဆင်ပြီးကတည်းက လစ်လပ်နေတာ ဖြစ်ပါတယ်။

ဒါပေမဲ့ ဒီအပြောင်းအရွှေ့ လမ်းကြောင်းကတော့ လွယ်ကူလှတာ မဟုတ်ပါဘူး။ တစ်ဖက်မှာတော့ Galatasaray ဥက္ကဋ္ဌ Dursun Ozbek က "ဈေးနှုန်း ဘယ်လောက်ပဲရရ ကျွန်တော် Victor Osimhen ကို မရောင်းဘူး" လို့ အခိုင်အမာပြောကြား ထားတာကြောင့် အပြောင်းအရွှေ့ဇာတ်လမ်းဟာ ပိုမို ရှုပ်ထွေးသွားခဲ့ပါတယ်။ ဒါပေမဲ့လည်း Arsenal နဲ့ Tottenham တို့ကတော့ ဥက္ကဋ္ဌရဲ့ တင်းခံမှုကို ဂရုမစိုက်ဘဲ စာချုပ် သေချာစေဖို့ ဆက်လက် ကြိုးပမ်းနေကြပါတယ်။

တန်ဖိုးအားဖြင့် ပေါင် ၅၈ သန်းဝန်းကျင် သတ်မှတ်ခံထားရတဲ့ Victor Osimhen အတွက် ကလပ်နှစ်သင်းစလုံးက အကြီးအကျယ် ရင်းနှီးမြှုပ်နှံဖို့ ပြင်ဆင်နေတာပါ။ အကယ်၍ သူသာ Premier League ဆီ ရောက်ရှိလာခဲ့ရင် အသင်းရဲ့ တိုက်စစ်ပိုင်း ကစားဟန်ကို လုံးဝ ပြောင်းလဲပစ်နိုင်မှာဖြစ်လို့ ဒီနွေရာသီရဲ့ စိတ်လှုပ်ရှားစရာအကောင်းဆုံး သတင်းတစ်ခုအဖြစ် စောင့်ကြည့်ရတော့မှာ ဖြစ်ပါတယ်။