Arsenal နဲ့ အပြောင်းအရွှေ့ ဆွေးနွေးနေချိန် Galatasaray ရဲ့ ကမ်းလှမ်းမှုကို Gabriel Martinelli ငြင်းပယ်

Galatasaray အသင်းက ပေါင် ၃၈ သန်းနဲ့ ကနဦးစတင်ကမ်းလှမ်းမှု ပြုလုပ်ခဲ့ပေမဲ့ Gabriel Martinelli ကတော့ ဒီအပြောင်းအရွှေ့ကို ပြတ်ပြတ်သားသား ငြင်းပယ်ခဲ့ပြီးနောက် Arsenal မှာပဲ ဆက်ရှိနေဖို့ ဆုံးဖြတ်လိုက်ပါတယ်။ Arsenal ရဲ့ တောင်ပံကစားသမား ဖြစ်သူ Gabriel Martinelli ရဲ့ အသိုင်းအဝိုင်း ဘက်ကလည်း Galatasaray ဆီ ပြောင်းရွှေ့ဖို့ ဖြစ်နိုင်ခြေမရှိဘူးလို့ ကလပ်အသင်းထံ အသိပေးထားတယ်လို့ သိရပါတယ်။

ဒါပေမဲ့ နည်းပြချုပ် Mikel Arteta ရဲ့ အသင်းဟာ လက်ရှိအချိန်မှာ တိုက်စစ်ပိုင်း ရွေးချယ်စရာတွေကို ပြန်လည်သုံးသပ်နေပြီး Gabriel Martinelli အတွက် ကမ်းလှမ်းမှုတွေကို လက်ခံစဉ်းစားဖို့ လမ်းဖွင့်ထားသလို သူ့ရဲ့နေရာမှာ အစားထိုးဖို့ တိုက်စစ်မှူးသစ် တွေကိုလည်း ရှာဖွေနေပါတယ်။ တိုက်စစ်ပိုင်းမှာ ကစားသမားသစ်တွေ ရောက်ရှိလာတော့မယ့် အခြေအနေကြောင့် Emirates ကွင်းမှာရှိတဲ့ Gabriel Martinelli ရဲ့ အနာဂတ်ကတော့ ပိုပြီး မရေမရာ ဖြစ်လာခဲ့ပါပြီ။

ဒီ Brazil လက်ရွေးစင် ကစားသမားရဲ့ လက်ရှိ စာချုပ် ဟာ နောက်ဆုံးကာလ ဖြစ်တဲ့ တစ်နှစ်သာ ကျန်ရှိတော့ပြီး Arsenal ဘက်ကတော့ နောက်ထပ်တစ်နှစ် သက်တမ်းတိုးခွင့် ရှိနေပါတယ်။ ဒါပေမဲ့ ကလပ်အသင်းအနေနဲ့ တိုက်စစ်ပိုင်းမှာ အားဖြည့်ဖို့ အလေးအနက် ရည်မှန်းထားတာကြောင့် Gabriel Martinelli အတွက် ပုံမှန်ပွဲထွက်ခွင့်ရဖို့ ရုန်းကန်ရမယ့် အနေအထား ရှိနေပါတယ်။ Arsenal အသင်းဟာ Morgan Rogers နဲ့ Vinicius Jr တို့လို ကစားသမားတွေကို ပစ်မှတ်ထားခဲ့ပေမဲ့ သူတို့အားလုံးက တခြားကလပ်တွေကိုပဲ ရွေးချယ်သွားခဲ့ကြလို့ Gabriel Martinelli ရဲ့ အခြေအနေက ပိုပြီး ရှုပ်ထွေးသွားခဲ့ရပါတယ်။

ပြီးခဲ့တဲ့ နွေရာသီက Bayern Munich ရဲ့ စိတ်ဝင်စားမှုဟာ တရားဝင် ကမ်းလှမ်းမှု ဖြစ်မလာခဲ့သလို လက်ရှိအချိန်အထိလည်း England၊ စပိန်၊ ပြင်သစ် ဒါမှမဟုတ် အီတလီ အပါအဝင် ဥရောပ ထိပ်တန်းလိဂ်တွေဆီကနေ ခိုင်မာတဲ့ ကမ်းလှမ်းမှုမျိုး မရှိသေးပါဘူး။ AS Roma က စိတ်ဝင်စားမှုအနည်းငယ် ပြသခဲ့ပေမဲ့ Gabriel Martinelli တောင်းဆိုတဲ့ လစာနှုန်းထားကို မပေးနိုင်တာကြောင့် သူ့အတွက် ရွေးချယ်စရာ လမ်းကြောင်းက ပိုပြီး ကျဉ်းမြောင်းသွားခဲ့ရပါတယ်။

Arsenal ရဲ့ နည်းဗျူဟာ အရတော့ Gabriel Martinelli ကို ကလပ်မှထွက်ခွာသွား ခွင့်မပြုခင်မှာ သင့်တော်တဲ့ အစားထိုးကစားသမားတစ်ဦးကို အရင်ဆုံး ရှာဖွေဖို့ သေချာစေ ချင်ပုံရပါတယ်။ အပြောင်းအရွှေ့စျေးကွက် ပိတ်သိမ်းဖို့ ရက်သတ္တပတ်အနည်းငယ် သာ လိုတော့တဲ့အချိန်မှာ Arsenal အနေနဲ့ ဒီအခြေအနေကို အထူးသတိထား ကိုင်တွယ်ရမှာ ဖြစ်ပါတယ်။ အကယ်၍သာ Gabriel Martinelli ရဲ့ နေရာမှာ အစားထိုးမယ့် ကစားသမားသစ်တစ်ဦးကို ခေါ်ယူနိုင်ခဲ့ရင်တော့ အပြောင်းအလဲတွေ ဖြစ်လာနိုင်ပါသေးတယ်။

တစ်ဖက်မှာတော့ Arsenal အနေနဲ့ အသင်းမှာ အနာဂတ်မရေမရာ ဖြစ်နေတဲ့ Gabriel Jesus အပါအဝင် တခြားကစားသမားတွေရဲ့ အပြောင်းအရွှေ့အပေါ်ကိုလည်း အာရုံစိုက်လာနိုင်ပါတယ်။ လက်ရှိ အသင်းလူစာရင်း အပြောင်းအလဲများ ကြောင့် Arsenal ကတော့ တိုက်စစ်ပိုင်းကို ပိုမိုတောင့်တင်းအောင် ပြင်ဆင်ဖို့ အပြည့်အဝ ဆုံးဖြတ်ထားပုံရပါတယ်လို့ သုံးသပ်နေကြပါတယ်။